Induna zikhuthaza imikhuba yamasiko emihle ekulwiseni iHIV

iNduna uNkalakatha

YiNtatheli kaMthunywa

INKOKHELI zomdabu zithi kumele kubuyiselwe njalo kulondolozwe imikhuba yesintu emihle emphakathini, bethi ukungaziphathi kwabantu lokungazihloniphi yikho okwenza kumemetheke umkhuhlane we HIV kanye lezinye izifo ezithelelwana emacansini, ikakhulu phakathi kwabantu abasakhulayo.

Ikhuluma kumhlangano wabaphathekayo eNkayi ngoLwesithathu induna uNkalakatha ithe inkokheli zilomlandu wokuhlala zikhuluma lomphakathi ukuze zenelise ukuphakamisa amasiko ziphinde zibuyisele imikhuba emihle eyalahleka ngokuhamba kwesikhathi.

“Induna zonke kumele zivakatshele izikolo ezigabeni zazo ukuze zikhulume labafundi, njengoba lisazi okubangela ukuthi umkhuhlane we HIV kumemetheke yikuba abantwana abanengi abaziphathi kuhle.

Imikhuba yethu lokuziphatha kumele kube ngokunye esikufundisa abantwana. Kumele senelise ukukhuluma labo ukuze kube lenguquko ekuziphatheni kwabo,” utsho njalo.

Induna uNkalakatha ithe inkokheli zomdabu zilomlandu omkhulu ekusekeleni imizamo kaHulumende ejonge ukuqeda iAIDS kusiyafika umnyaka ka 2030 ngokuqhuba izinhlelo zokufundisa abantu ngalumkhuhlane.

“Lapho esihlangana khona kumele sibe sikhuluma ngokuqeda iAIDS kusiyafika u2030,” utsho njalo.
Uthe izinkundla zamasiko zindawo ezibalulekileyo zokukhuluma ngokuzivikela ku-HIV lokukhuthaza ukuziphatha kuhle emphakathini.

Induna uNkalakatha ithe induna kumele zibelemithetho esebenza ezigabeni zazo ezidalelwe ukuphathisa ukuvikela ukumemetheka kwegcikwane leHIV. “Isibonelo, singathi ngaphambi kokuthi umuntu azibophezele emtshadweni, kumele ahlolwe i-HIV. Le yindlela esingayisebenzisa emphakathini ukuze kungabi lokumemetheka kwegcikwane leli,” kutsho induna

Induna ikhuthaze njalo umphakathi ukuthi wazi ukwehlukanisa phakathi kwemikhuba yesintu emihle lale eletha ubungozi empilweni.

Uthe kubalulekile ukunanzelela lokulungisisa imikhuba emibi kulokucabanga ukuthi imikhuba yethu yesintu mibi yonke.

Induna iphethe ngokugcizelela ukuthi induna zimqoka kakhulu ekukhuthazeni ukuziphatha kwabantu, ikakhulu phakathi kwentsha, ngokubakhulisa, ngokuxhumana labo lokukhuthaza imikhuba yesiko emihle.

Share on FacebookPost on XFollow usSave